Zeintzuk gara?


Adinduk 1996. urtean erein zuen bere hazia. Zuhaitz honen hiru adarrak: Elena Iraolagoitia (psikologoa), Eva Pérez de Albéniz (psikologoa) eta Sonia Ulazia (pedagogoa). Bergaran izan zen Gerontologia Psikosozialaren Masterraren 1. edizioan ezagutu genuen elkar eta bi urte horietan izandako bizipen eta hizketaldi luzeei esker konturatu ginen talde polita osatzen genuela eta gerontologiaren munduan gauza asko genituela elkarrekin egiteko.

Gaur egun gure lan taldea beste bi pertsonarekin osatu dugu eta gainera osasuna eta sexologia arloko beste lankide batzuekin elkarlanean aritzen gara. Adindu diziplina anitzeko taldea gara eta honek pertsonaren maila ezberdinetako beharrei erantzuteko aukera ematen digu, beti helburu jakin batekin: pertsonari ongizatera bidean laguntzea.

Adindu sortu zen garaitik hona gauza asko aldatu dira pertsona nagusien kolektiboan eta baita gure zerbitzu eskaintzan ere. Kolektibo hau oso zabala eta heterogeneoa da eta talde honen barruan aurkitu ditzakegu: jubilatuta baina oso aktibo jarraitzen duen pertsona bat, menpekotasunen bat duen beste bat edota dementziak jota dagoena. Pertsona guzti horien behar ezberdinei egokitu eta erantzuna ematen saiatzen gara Adindun. Horretaz aparte pertsona nagusiekin lan egiten duten profesional eta senideentzako formakuntza eta laguntza psikologikoa ematen ditugu.